Detaje të reja dalin lidhur me vrasjen makabre e Alba Cenkos, e cila u vra nga bashkëshorti i saj Kastriot Cenko në Greqi.
39-vjeçari pasi e vrau me çekiç të shoqen dhe e mbyti, fshehu trupin e pajetë të 32-vjeçares për një javë në papafingon e banesës së tyre në Amopelikipoi.
Përgjatë javës që mbante kufomën e gruas në papafingo, Cenko përmes telefonit të saj i dërgonte mesazhe të afërmve të Albës në mënyrë që ata mos të dyshonin asgjë për krimin makabër.
Por motra e viktimës dyshoi që në momentin e parë që Kastrioti i çoi mesazhe nga telefoni i Albës.
Në një intervistë për News 24 vjehrra e motrës së Albës tha se nusja e saj dyshoi që në fillim.
Ajo tha se një komunikim që Kastrioti pati me nusen e saj, ai i kishte thënë se e motra kishte ikur me dëshirën e saj nga shtëpia. Në komunikimin me motrën e Albës, ai e cilësoi viktimën “Prostitutë”.
Vjehrra e motrës së Alba Cenkos: Nga Facebook e mora vesh lajmin. Ata kishin një javë që e kërkonin. Ku i dinim ne se qysh ishin marrëdhëniet, nuk kisha dëgjuar për probleme. Gjoja se i kishte shkruar vetë çunit ajo vetë që gjoja, mami po iki…nusja e pa dhe tha nuk është shkrimi i motrës time ky. Diçka fshihet pas telefonit, se nuk shkruan kështu motra ime. Ajo e thoshte se nuk është shkrimi i motrës sime ky. Kastrioti herë e hapte, herë se hapte, jo ka ikur vetë me dëshirë, jo prostitutë. Ishalla të jetë gjallë, mos ta kenë vrarë, kështu tha.
Kastriot Cenko fillimisht e goditi gruan e tij, Alba Cenko me çekiç në kokë, e vendosi karikuesin e telefonit në qafë dhe më pas e mbyti. Trupin e pajetë të 32-vjeçares e vendosi në dollapin e dhomës së gjumit dhe më pas në papafingo, ku edhe u gjet 7 ditë pas krimit më, 5 Dhjetor.
Teksa planifikoi se si do të justifikonte zhdukjen e saj, Kastriot Cenko përdori celularin e viktimës për të mashtruar djemtë e tyre të mitur dhe familjarët e Albës.
39-vjeçari u dërgoi mesazh dy fëmijëve të mitur me numrin e nënës së tyre ku i shkruante: “Mami u largua për të fituar para, kam ikur larg”.
Tronditëse janë faktet që dalin nga krimi makabër në familjen shqiptare. Prej kohësh autori ishte i bindur se gruaja e tradhtonte me një shok. Ditën e krimit, 39-vjeçari deklaroi se kishte dëgjuar gruan e tij duke folur në telefon. Ai tha se mendoi që Alba Cenko po fliste me të dashurin e saj dhe vendosi t’i merrte jetën.
Kastriot Cenko e vrau pa u vënë re aspak fëmijët që po flinin në dhomën tjetër dhe të nesërmen e çoi trupin e saj në papafingo. Madje, duke u shtirur si viktima, u dërgoi mesazhe djemve të tij duke përmendur në tekst fjalën “baba” të paktën 6 herë, si edhe duke theksuar rëndësinë e rolit të tij.
Në deklaratën e tij në polici, 39-vjeçari raportohet se ka thënë se konfliti me të shoqen ka nisur në mesnatë, ku ka dëgjuar se ajo po fliste në telefon me një burrë. Sipas tij, gruaja është shprehur se do të merrte djalin e madh dhe do të largohej nga banesa.
“Ndërsa fëmijët flinin diku rreth orës 01:30, u zgjova dhe pashë që ajo nuk ishte në krevat. Ajo ishte në banjë duke folur në telefon. E dëgjova të thoshte se do të merrte djalin tonë të madh dhe do të largohej, ndërsa zëri i një burri tingëllonte në anën tjetër të telefonit. I thashë të vinte në dhomë për të folur. E pyeta se kush ishte dhe ajo më tha se nuk ishte askush dhe se po shikonte video. Pas pak ajo pranoi se po fliste me një burrë dhe se do të merrte fëmijën e madh dhe do të largohej”, ka thënë ai në polici.
Shqiptari Kastriot Cenko ka dëshmuar se atë natë gruaja i ka thënë se djali i madh nuk ishte fëmija i tij, dhe në atë moment ka marrë çekiçin dhe e ka goditur.
“Më tha që nuk kam para dhe nuk do të rrinte me mua. E pyeta “pse po na merr djalin e madh?” dhe më tha që këtë fëmijë nuk e bëri me mua dhe vetëm djalin e vogël bëmë bashkë, u hutova plotësisht dhe hapa çantën që marr në punë, të cilën e kisha pranë shtratit tonë, mora çekiçin dhe e godita”, a dëshmuar ai para oficerëve sipas mediave greke. /korrieri
