Prej pasdites së të martës Italia është goditur nga një stuhi me mot të keq, duke sjellë dëme në shumë qytete të vendit, nga veriu në jug. Si pasojë e rrëshqitjes së dherave dhjetra njerëz janë evakuuar nga banesat e tyre, ndërkohë që dy persona rezultojnë të zhdukur, bëhet fjalë për një 42-vjeçar dhe nënën e tij 74-vjeçare. Të dy ata kishin shkuar pasdite në tokën e tyre, dhe nuk janë kthyer më në banesë, ndërkohë që zjarrfikësit kanë nisur kërkimet në vendin e ngjarjes.
Zjarrfikësit, Karabinierët dhe efektivët e Policisë së Shtetit vijojnë kërkimet për dy personat, nënë e bir, të cilët po udhëtonin në një Apecar: mjeti me tre rrota, i cili u përmbyt nga lumi i baltës dhe mbeturinave dhe u gjet në një skarpat. Nga hetimet e para nga karabinierët rezultoi se gruaja dhe djali i saj ishin të zënë me vjeljen e lajthive kur u befasuan nga rrëshqitja e dheut dhe tentuan të arratiseshin me automjetin: me siguri kanë udhëtuar disa metra para se balta të marrë përpara mjetin e tyre.
Një stuhi e dhunshme goditi gjithashtu disa komuna në provincën e Avellino në orët e vona të pasdites. Një nga situatat më kritike ka ndodhur në Baiano, ku vërshimi i ujit dhe baltës ka lënë të bllokuar shoferët e disa mjeteve.
Shumë njerëz në provincat e goditura nga moti i keq dolën në rrugë nga frika, duke marrë me vete dhe makinat e tyre. n
“Ne po mbledhim të gjitha mjetet në dispozicion në Talanico, duke përfshirë edhe qentë për të kërkuar njerëz”, sqaroi komandanti i zjarrfikësve të Caserta-s, Paolo Massimi, i cili konfirmon se po kryhen kontrolle për dy persona, të cilët ende nuk janë gjetur. “Jemi në kontakt të vazhdueshëm me Mbrojtjen Civile dhe po shpëtojmë shumë qytetarë”.
Momente frike ka pasur gjithashtu dhe për një djalë 12-vjeçar, për të cilin nuk kishte asnjë lajm të mëtejshëm: ai ishte brenda katit përdhes të një shtëpie midis Sirignano dhe Mugnano del Cardinale dhe arriti të shpëtonte veten duke u kapur pas kangjellave dhe duke u ngjitur në katin e parë të shtëpisë e cila ishte e mbuluar nga uji.
