Flasin Irisa Puca dhe Hysen Speci , si e ngriti perandorinë e mashtrimit Amant Josifi , qindra miliona euro të zhvatura

Flasin Irisa Puca dhe Hysen Speci , si e ngriti perandorinë e mashtrimit Amant Josifi , qindra miliona euro të zhvatura

Emisioni ‘Në shënjestër’ në News 24, trajtoi këtë të mërkurë, dosjen gjermane të mashtrimit me call center, ku i përshirë del të jetë kompania e drejtuar nga gjeorgjiani me pasaportë izraelite Mikheil Biniashvili i njohur edhe me pseudonimin Mishka dhe Amant Josifi, dikur ish-këshilltar i Ministres së Mbrojtjes, Olta Xhaçka. 

Nga ky mashtrim rezulton se janë zhvatur miliona euro nga llogaritë e mijëra qytetarëve në Evropë.

Ai është sot një nga njerëzit më të kërkuar në Evropë, personi që krijoi një perandori financiare nëpërmjet mashtrimit. Ai arriti të zhvasë të ardhurat e mijëra qytetarëve në Evropë, duke shfrytëzuar gjenialitetin dhe bashkëpunimin e tij të pashembullt. 

Amant Josifi është një nga ata persona që studiohen për fenomenin e mashtrimit në call centera dhe qendra telefonike, një problem i përhapur edhe në Shqipëri.

Ish-këshilltari i ministres së Mbrojtjes, Olta Xhaçka, dhe ish-ortaku në biznes i vëllait të kryeministrit Edi Rama, Olsi Rama, aktualisht jeton në Dubai dhe përpiqet të shpëtojë nga ekstradimi në Spanjë. 

Në periudhën midis 2015-2022, bashkë me ortakun e tij, Mikheil Biniashvili, njohur si Mishka, ata ndërtuan një platformë kibernetike për mashtrim, duke shfrytëzuar besimin e qytetarëve të Evropës për të përvetësuar llogaritë e tyre.

Skema e mashtrimit 

Amant Josifi dhe Mikheil Biniashvili krijuan jo vetëm një skemë të gjerë mashtrimi ndërkombëtar, por edhe e shpërndanë në disa vende të Evropës, duke filluar nga Ballkani Perëndimor deri në Kaukaz. 

Në hetimeve të institucioneve ligjzbatuese gjermane janë përfshirë edhe personat e tjerë, përfshirë programuesit kompjuterikë, të cilët ishin në dijeni të këtij mashtrimi. 

Autoritetet gjermane po hetojnë me seriozitet pas sinjalizimeve dhe denoncimeve të pranuara nga qytetarë të ndryshëm, të cilët u shfrytëzuan dhe u dëmtuan nga këto Call Center deri në pikën që lanë të gjithë pasurinë e tyre aty.

Pas zërave që i ftonin nëpërmjet softuerëve të tyre, u krijua një industri e tërë grabitje, e cila shprehet në zbulimet e autoriteteve gjermane dhe të tjera. Hetime që filluan nga autoritetet spanjolle u zbuluan se grupi i organizuar kriminal kishte nisur aktivitetin e tyre nëpërmjet kompanive që operonin në Call Center-at e Shqipërisë. Mashtrimi kompjuterik përhapet si gangrenë në Evropë, duke shqetësuar shtetet si Gjermania, Spanja dhe Suedia. Gjithnjë e më shumë qytetarë denoncojnë këtë sipërmarrje kriminale.

Hetimet

SPAK ka dërguar në vitin 2021 kërkesën për procedim penal me të pandehur shtetasit Adrian Korriku, Irisa Puca, Merxhan Çeliku, Endri Bulku, Erlind Çekaj, të cilët akuzohen për kryerjen e veprës penale të ‘Mashtrimit kompjuterik’, në dëm të shumë personave, në kuadër të grupit të strukturuar kriminal.

Shqipëria u bë pjesë e grupit të përbashkët hetimor, në përbërje të së cilës janë autoritetet gjyqësore të Spanjës, Gjermanisë, Suedisë, Finlandës, Letonisë, Ukrainës, Gjeorgjisë, Maqedonisë së Veriut, etj, pas zbulimit se një sërë kompanish kanë kryer aktivitetin e ‘call center’, duke kryer dhe mashtrimet online. në platforma mashtruese të shtetasve europianë.

Autoritetet gjermane dhe partnerët zbuluan shpejt se kompanitë, të cilat kishin zgjeruar veprimtarinë e tyre mashtruese në Shqipëri, Ukrainë, Gjeorgji dhe më tej, ishin nën drejtimin e ‘Milton Group’. Pronari i kësaj kompanie u identifikua si shqiptari Amant Josifi, i cili sipas hetimeve të SPAK në bashkëpunim me ‘Eurojust’ dhe ‘Europol’, konsiderohej personi që drejtonte gjashtë qendra të mashtrimit telefonik në Shqipëri, të cilat ishin lidhur drejtpërdrejt me ‘Milton Group’.

Lokalizohen kompanitë

Këto kompani të cilat drejtoheshin nga ‘Milton Group’, shpejt u lokalizuan në disa shtete, si Shqipëria, Maqedonia e Veriut, Ukraina, Gjeorgjia etj.

Nga të dhënat hetimore të dërguara nga Autoritetet Gjyqësore Gjermane, del se kanë rezultuar lidhje të shtetasve shqiptarë me kompaninë ‘Milton Group’ që ka organizuar veprimtarinë kriminale të mashtrimit kompjuterik online, në mjaft shtete të Europës Perëndimore.

Nga autoritetet gjermane është urdhëruar kontrolli i platformave mashtruese tregtare ‘Absolut Global Markets’, ‘AurumPro’ dhe ‘Finaxis’.

Megjithatë, sipas këtyre autoriteteve, konsiderohet e sigurt se i njëjti grup kriminal është gjithashtu përgjegjës për shumë platforma të tjera tregtare, kryesisht identike, Kjo duket qartë nga hetimet financiare të kryera ndaj kompanive, si dhe nga vlerësimet e gjurmëve të ndryshme teknike, përfshirë IP me adresa identike.

Le të përqendrohemi në dëmet e shkaktuara, rolin e personazheve kryesore të kësaj perandori mashtrimi, dhe impaktin e tyre në historinë e kësaj ngjarjeje. Përveç kësaj, le të analizojmë veçanërisht situatën në Gjermani, ku shumë qytetarë u mashtruan nga këto platforma. Ata ranë pre e një sistemi të sofistikuar, të drejtuar nga mendje gati gjeniale, por të ndyra.

Hetimet gjermane

Në zyrat tona qendrore kibernetike në Bavari, janë dorëzuar afërsisht 67 kallëzime penale, Sipas analizës që kemi kryer dëmi i shkaktuar nga platformat ‘AurumPro’, ‘Fianxis’ dhe ‘AGMarkets’, llogaritet deri më tani në 1.8 milionë euro.

Po kështu janë dorëzuar 35 kallëzime për platformën ‘Centrobanc’, ku dëmi në total mendohet të jetë 1.7 milionë euro.

Ndërsa 40 ankesa janë për platformën ‘CapitalMarketsBanc’, ku dëmi në këtë rast llogaritet të jetë 1.6 milionë Euro.

Dhe për platformën ‘Cryptokartal’, 31 kallëzime, me një dëm në total, prej 1 milionë euro.

Sipas autoriteteve gjermane, Bavaria është vetëm një nga shumë lande të prekura nga ky fenomen në Gjermani. Kallëzime të ngjashme kanë ardhur edhe nga shumë lande të tjera. Platformat e lidhura me kompaninë ‘Milton Group’, të drejtuar nga Amant Josifi dhe ortaku i tij gjeorgjian, Mishka, kishin udhëheqjen e skemës së mashtrimit. Kjo situatë çoi në një operacion të përbashkët të shumë skuadrave hetimore në fund të vitit 2022. Këto skuadra hetimore kryenin kontroll të befasishëm në disa Call Center-a në Shqipëri, ku mendohet se kishte filluar ky mashtrim me përmasa të jashtëzakonshme.

Kontrolle dhe dokumente

Më datat 8 dhe 9 Nëntor 2022, u finalizua operacioni ndërkombëtar ‘Frida-Refox’, ku në Shqipëri u kontrolluan disa qendra të thirrjeve telefonike në Tiranë, Elbasan dhe Vlorë.

Ku u ndaluan 4 shtetas të dyshuar si dhe u shpallën në kërkim 6 të tjerë.

Aty ku krahas portofoleve në kriptovalutë dhe parave në cash u gjetën edhe dokumente identifikimi të shtetasve lituanezë dhe gjeorgjianë, karta banke lituaneze etj.

Do të ishte ky kontroll që do të identifikonte edhe personat kryesorë të cilët fshiheshin pas këtyre platformave mashtruese, të cilët lidheshin me kompaninë ‘Puma Ts’, edhe kjo kompani në pronësi të Amant Josifit dhe gjeorgjianit me pasaportë izraelite, Mishka.

Zbërthimi i një serveri 

Gjatë vlerësimit të një serveri u arritën të identifikoheshin plotësisht personat të cilët ishin të lidhur me kompaninë e IT ‘PumaTS/ SMCompany’.

Që janë të pandehurit Irisa Puca, Endri Bulku, Erlind Çekaj dhe Adrian Korriku. Ndërkohë që rezultoi se personi i pandehur Merxhan Çeliku, kishte komunikime të drejtpërdejta me viktimat e mashtrimit në Austri dhe Gjermani, nëpërmjet këtyre platformave.

Kjo është provuar plotësisht nëpërmjet adresave IP nga ku janë bërë komunikimet, si dhe lëvizjet e llogarive bankare dhe ato të valutave në monedha virtuale, në të cilat kanë kaluar paratë e viktimave.

Gjatë hetimit, u zbuluan lidhjet e Amant Josifit me kompaninë ‘Milton Group’ dhe kompanitë bija që ai kishte krijuar për të fshehur aktivitetin e tij kriminal. Po ashtu, u zbuluan edhe pasuritë e marramendëshme monetare që ai kishte fituar nga ky aktivitet. Disa prej këtyre pasurive ishin transferuar në emër të familjarëve të tij.

Shuma të mëdha 

Në vijim të hetimeve, në bashkëpunim me autoritetet spanjolle janë gjendur dhe sekuestruar në posedim të shtetasit Amant Josifi, subjekte tregtare të administruara nga ai, si dhe familjarë të tij, si llogari bankare me shumat monetare në total në vlerën prej 2 225 868 66 euro dhe 2 844 936 37 lekë. Ndërsa Amant Josifi po ndiqet penalisht nga autoritetet spanjolle dhe ka një kërkesë ekstradimi drejtuar Emirateve të Bashkuara Arabe, ku ai u arrestua në Dubai disa muaj më parë, një personazh tjetër kryesor në këtë histori është Mikheil Binashvili, i njohur ndryshe si Mishka. Ai konsiderohet si truri i operacionit të mashtrimit me Call Center, duke u përfshirë në një skemë që në periudhën 2015-2022 ka mashtruar mijëra qytetarë në Evropën Perëndimore dhe ka grabitur miliona euro. Binashvili ka punuar me ekspertë kompjuterikë shqiptarë për të krijuar sisteme softuerike të sofistikuara për mashtrim, duke përfshirë edhe krijimin e kompanive bija për të fshehur aktivitetin kriminal. Ai ka hapur pika të ngjashme në vendet si Maqedonia e Veriut, Lituania dhe Gjeorgjia, me ndihmën e inxhinierëve shqiptarë të inxhinierisë kompjuterike. Autoritetet gjermane identifikuan fillimin dhe zbulimin e skemës nga një shqiptar, Hysen Speci, i cili më pas do të ndihmojë në zbardhjen e lidhjeve të tjera të Mishka gjeorgjianit.

Pas hetimeve të kryera është provuar se pas këtyre platformave qëndron një grup i nivelit të lartë të lidhur me krimin, që klasifikohet në kategorinë e krimit të organizuar.

Grup kriminal që vitet e fundit dispononte, qendra thirrjesh të quajtura ‘Call Center’ në shtete si Gjeorgjia, Shqipëria dhe Maqedonia e Veriut.

Ku bëjnë pjesë edhe shqiptarë, tashmë të identifikuar për rolin e tyre.

Ndër këta persona ata që cilësohen si më të rëndësishëm në rolin e tyre janë shtetasit shqiptar Irisa Puca dhe Adrian Korriku.

Të cilët kanë lidhje me ‘Milton Group’, ku ndër të tjera përmenden edhe ‘Spot MT’ dhe ‘Puma TS’.

Siç thamë, personi kryesor në këtë sipërmarrje kriminale është gjeorgjiani Mikheil Biniashvili, i cili ka pranuar para hetuesve gjermanë, përmes avokatit të tij mbrojtës, se ishte pronari i Call Center-it ‘Spot MT’ në Shqipëri, si dhe pas softuerit ‘Puma TS’.

Lidhje dhe kompani 

Si fillim pagesa ishte kryer mbi bazën e një komisioni, por më vonë ishte kaluar në një pagesë me normë fikse. Biniashvili, nuk e ka kundërshtuar faktin se ai ishte në dijeni të xhirove në lidhje me brandet. Firma ‘Spot MT’ u themelua më 3 Shkurt 2014 me seli në Tiranë, ku si aktivitet u përcaktua ‘Call Center’.

Po këtë vit, më datë 22 Dhjetor, kompania ‘Terminal Investment Management’ i kaloi në pronësi Mikhael Beniminit, ku bëhet fjalë për shtetasin gjeorgjian Mikheil Biniashvili, i cili e bleu këtë firmë duke paraqitur një pasaportë izraelite, ku vetëm 12 ditë më pas, më datë 24 Dhjetor 2014, kompania ‘Termimal Investments Management LLC’ u emërtua ‘Spot MT LLC’.

Në vitin 2018, rezulton se Biniashvili ia shiti kompaninë shtetasit Andri Kalaus, por që besohet se Biniashvili e shiti kompaninë vetëm me letra, pasi ai vazhdonte të merrte të gjitha vendimet e mëtejshme sipërmarrëse.

Të dhënat e bashkëpunimit të kompanisë ‘Puma Ts’ me ‘Aurum Pro’ u zbuluan në një fazë më të vone të hetimit gjerman, pas zbulimit të një serveri që shërbente për lidhjen e tyre. Nëpërmjet këtij zbulimi, u zbuluan edhe shumat marramendëse që kishin siguruar këto kompani përmes mashtrimit.

Kallëzime të shumta erdhën pas qindra padive që qytetarë evropianë kishin dorëzuar në autoritetet ligjzbatuese në vendet e tyre. Gjithashtu, një shqiptar rrëfeu informacione që ndihmuan në identifikimin e emrave të programuesve të tjerë që kishin ndihmuar Biniashvilin në këtë mashtrim.

Irisa Puca njeriu kyç i Josifit

Më 23 Gusht 2023, nga Zyra Kriminale e Landit të Sachsen u mor në pyetje si i akuzuar i pandehuri Hysen Speci. Ai tha se të parët që shkuan në Gjeorgji për të ndihmuar Biniashvilin, ishin Irisa Puca dhe Erlind Çekaj, të cilët më herët ishin takuar me Mishkën në Gjeorgji. Sipas tij Irisa kishte për detyrë të menaxhonte programistët dhe se projekti quhej ‘Puma TS’. Speci tha se ata e dinin shumë mirë që këto programe po përdoreshin për mashtrimin e shtetasve të ndryshëm europianë. Dhe se bëhej fjalë që nëpërmjet sistemit të përdorur ‘MIT 4’ personit të dëmtuar të mund t’i krijohet iluzioni i humbjeve, që në të vërtetë nuk kanë ndodhur. Në vend të tyre paratë arkëtoheshin për qëllime mashtrimi. Autoritetet gjermane, pasi udhëtuan drejt Gjeorgjisë, arritën të provojnë nëpërmjet kontrolleve të kryera në disa Call Centera në këtë shtet, se në serverin e firmës ‘Hetzner’ u gjendën regjistrat e kompanisë ‘Puma TS’. Në lidhje me këtë platformë u regjistruan 24 padi penale, dhe dëmi përllogaritet të jetë afërsisht 697,633.94 euro. Nga këto hetime, u identifikua Irisa Puca, e cila punon si menaxhere projekti në firmën ‘Puma TS’, duke përdorur pseudonimin Iris Stone. Po ashtu, u identifikua edhe Adrian Korriku, si një punonjës i ‘Puma TS’.Irisa Puca, ka pseudonimin Iris Stone.

Irisa Puca ose Iris Stone

Ajo ka studiuar për informatikë në Universitetin e Tiranës.

Puca dyshohet se ishte përgjegjëse për zhvillimin e sistemeve CRM, që janë përdorur për funksionimin e platformave mashtruese.

Ku nga hetimet doli se të dhënat e klientëve ruhen në këto sisteme dhe pa këto ruajtje dhe menaxhim të të dhënave për klientët një platformë e tillë nuk mund të funksionojë ekonomikisht.

Po kështu provohet se Endri Bulku është një nga zhvilluesit e softuerëve për ‘Puma TS’.

Ashtu si edhe Erlind Çekaj që punon si drejtues i ekipit të zhvilluesve në këtë kompani.

Një tjetër person që rezulton aktiv në këtë aktivitet del të jetë edhe Adrian Korriku.

Ndërsa Merxhan Çeliku rezulton të ketë një llogari në Paypal që i atribuohen ‘Milton Group’.

Këto biznese, në dukje të ligjshme, në të vërtetë kanë operuar në aktivitetin e mashtrimit me platforma të ndryshme.

Ndërsa këta shtetas janë organizatorët e grupit të strukturuar kriminal ku persona të përfshirë, të lidhur me Shqipërinë janë shtetasit, Mikhail Binaishvili, etj.

Mishka dhe Amant Josifi zhvendosën ushtrinë e tyre nga Shqipëria fillimisht në Maqedoninë e Veriut dhe më pas në Lituani dhe Gjeorgji, ku vazhduan aktivitetin e tyre kriminal mashtrues. Irisa Puca, e njohur ndryshe si Irisa Stone, rezulton të jetë një person i rëndësishëm në grup, i cili është përgjegjës për sigurimin e biletave. Kontrolli i postës elektronike të saj tregon se Puca ka shërbyer në vende të ndryshme për llogari të Mishkës, duke zhvilluar softuerë që më pas janë përdorur për të mashtruar qytetarët në Evropë.

Hetimet gjermane

Nga kontrolli i emaileve të shtetases Irisa Puca, na rezulton se ky person është përgjegjës për sistemin e biletave, që përdoret edhe për platforma të tjera.

Në dëshminë e tij Eni/ Hysen Speci, thotë se ajo ka një lloj pozicioni si drejtuese ekipi.

Po kështu rezulton se Irisa Puca, ka një numër të madh grupesh në chat që i referohen sistemeve CRM, platformave te ndryshme, domeneve, adresave IP, etj. si dhe përmbajtje të tjera teknike në këtë kontekst.

Vetëm në llogaritë e SPOT MT, autoritetet gjermane mundën të gjenin miliona euro, të cilat mendohet se i përkasin qytetarëve evropianë të mashtruar nga kjo platformë. Ka pasur edhe platforma të ngjashme të krijuara nga ‘Milton Group’, falë bashkëpunimit të Amant Josifit dhe Biniashvilit.

Hetimet gjermane

‘Spot MT’ është një qendër thirrjesh (Call Centre), e regjistruar në QKR.

Gjatë vlerësimit të kësaj kompanie u arrit të zbulohej një llogari në emër të ‘Joshua Development LTD’, ku gjatë hetimeve në lidhje me ‘Capital Markets Banc’ edhe kjo një platformë mashtrimi, u sigurua se në këtë llogari rrjedhin afërsisht 16.9 milion euro.

Llogari, në të cilën mendohet se janë mbledhur paratë e personave të dëmtuar.

Ndërsa nga viti 2017 deri në vitin 2018, po për llogari të ‘Spot MT’, me anë të transaksioneve të ndryshme, mendohet se janë futur gati 1.9 milion euro.

Duke u bazuar në gjetjet e skuadrës së përbashkët të hetimit të ‘Eurojust’ dhe ‘Europol’, thuhet se ka ekzistuar shtrirje e gjerë e këtyre platformave mashtruese, të lidhura me një server të vetëm, me përafërsisht 80 të tilla. Vetëm 40 prej tyre ishin të dedikuara për tregun gjerman. Kjo tregon për rëndësinë e tregut gjerman dhe për pasurinë e qytetarëve të saj për krijuesit e këtyre platformave.

Hetimet gjermane

Deri më tani në lidhje me platformat e dedikuara për tregun në Gjermani, dëmi në total përllogaritet të jetë afërsisht 10 615 852 76 euro.

Ku del qartë se Irisa Puca, ka punuar si menaxhere projekti për ‘Puma TS’, si dhe krijonte përdorues në sistemin e biletave për punonjësit e rinj të ‘Milton Group’.

Nga ku rezulton se nëpërmjet rolit të saj në ‘SM Company’ dhe ‘Puma TS’, Puca kontribuonte në mënyrë aktive në zhvillimin e platformave mashtruese, shpërndarjen te klienti dhe më pas ofrimin e produkteve financiare mashtruese për ‘klientët’ gjermanë nëpërmjet qendrave të thirrjeve në vende si Gjeorgjia, Shqipëria, Ukraina dhe Maqedonia e Veriut.

Aty ku edhe mban kontakt të rregullt me pronarin e ‘Puma TS’, Mikheil Biniashvili, ndërkohë që njerëzit e shtuar në bisedën në grup, të njohur si ekipi ‘Zoe’ ishin të vetëdijshëm për faktin se në ‘Puma TS’ po zhvilloheshin softuere që po përdoreshin për platforma me qëllim mashtrimin e njerëzve në mbarë botën.

Sipas hetimeve dhe zbulimeve të kryera nga prokurorët gjermanë rezulton se vetëm nga ‘Spot MT’, një Call Center me qendër në Shqipëri, në pronësi të Biniashvilit, u janë shitur platforma të ngjashme mashtruese, qendrave të tjera të ngjashme të Call Center.

Hetimet gjermane

‘Spot MT’ është një Call Center në Shqipëri, nga e cila janë shitur platforma të ngjashme mashtruese ‘CapitalMarketsBane’.

Nga kjo platformë është gjeneruar një dëm prej 1 761 624 73 euro si dhe janë dëmtuar 43 qytetarë.

Përsa i përket ‘Puma TS’ bëhet fjalë për një zgjidhje softuere, që fillimisht u projektua në Shqipëri, Lituani dhe së fundmi në Gjeorgji. Ku nga hetimet doli se ato iu shitën në mënyrë preferenciale Call Center-ave. me të vetmin qëllim vënien në funksionim të platformave mashtruese si dhe për të financuar në mënyrë të jashtëligjshme vlerat e arritura të pasurisë.

Nga konstatimet e mësipërme mund të vërtetohet që ‘Puma TS’ mund t’i atribuohen drejtpërdrejt 93 platforma që janë objekt i procedimeve penale gjermane.

Këto platform kanë gjeneruar një dëm prej 15 905 560 14 Euro dhe 509 viktima, megjithëse numri i viktimave apo masa e dëmit nuk dihet ende për një numër të madh platformash.

Një nga bindjet se personat e përfshirë në këtë aktivitet ishin të vetëdijshëm për natyrën e mashtrimit që ofronin këto platforma, janë edhe bisedat që ata kanë zhvilluar në grupet e chatit që kishin hapur, për koordinimin e punëve dhe teknikën e funksionimit të këtyre softuerëve.

Hetuesit gjermanë gjetën këto biseda duke futur në brendësi të grupit, dhe dëshmitë e njërit prej personave kryesorë të përfshirë në këtë aktivitet treguan se ata ishin të vetëdijshëm për veprimet e tyre. Ky person po shërben si bashkëpunëtor i drejtësisë gjermane në këtë rast.

Hetimet gjermane

Indiciet për njohuritë e personave pjesëmarrës në veprimet mashtruese dalin edhe nga transkriptimi i përgjithshëm i marrjes në pyetje të të akuzuarit Hysen Speci si edhe nga analiza e shumë bisedave në grupe në ‘Skype’, në të cilat diskutohet vetëm për makinacione të jashtëligjshme.

Ata që morën pjesë në këtë bisedë ishin të vetëdijshëm se me ‘Puma TS’ po zhvillohet një softuere që përdoret për platforma dhe se po mashtrohen njerëzit në mbarë botën.

Në krye të ‘Puma TS’ qëndron Mikheil Biniashvili, pseudonimi i Mikhael Benimini, nga ku del se Irisa Puca dhe Adrian Korriku, kanë bashkëpunuar për veprat e mashtrimit dhe kanë shkaktuar miliona euro dëme, ku vetëm në territorin e Republikës Federale Gjermane nga ky raport aktualisht rezultojnë 552 viktima në lidhje me 94 platforma dhe një dëm paraprak prej 17 667 184 87 euro.

Një aspekt interesant është transferimi i operacionit të mashtrimit nga Shqipëria në Lituani. Atje, personat e të njëjtëve, në krye me gjeorgjianin Mishka, vendosën të shtrijnë aktivitetin e tyre. 

Rrëfehet Irisa Puca

Irisa Puca, e pyetur nga autoritetet gjermane, ka rrëfyer takimin që u zhvillua në Shqipëri dhe vendosjen për të zgjeruar mashtrimin përmes Call Center-ave edhe në Lituani.

Irisa Puca: Në fillim të vitit 2017 unë kam punuar në kompaninë ‘Spot MT’ në Shqipëri, ku detyra ime ishte menaxhere sistemi dhe konsistonte në krijimin e userave për punonjësit. Gjatë kësaj kohe kompania ‘Spot MT’ ka pasur menaxhere një shtetase të huaj ukrainase. Ndërsa si menaxher të përgjithshëm të kësaj kompanie i referoheshim një personi që quhej Mishka, i cili është gjeorgjian ose izraelit. Por që unë në atë kohë nuk kisha kontakte me të.

Më tej Irisa Puca rrëfeu për hetuesit gjermanë se ajo jo vetëm u rrit në përgjegjësi në vitin 2019, duke kaluar tashmë në departamentin e programimit, por gjatë këtij viti iu kërkua që të shpërnguleshin në Lituani.

Irisa Puca: Në muajin Janar të vitit 2019, unë u ngrita në detyrë, në departamentin e programimit ku pozicioni im ishte menaxhere e projektit ‘Ticket Sistem’.

Në këtë departament unë kam pasur epror të drejtëpërdrejtë shtetasin Endri Bulku. Ku gjatë këtij muaji na u shtua edhe një projekt tjetër zhvillimi që e kishte nisur Eni/ Hysen Speci.

Mbaj mend që në një mbledhje të zhvilluar në Tiranë, ku kanë qenë të pranishëm Eni Speci, Mishka, Endri Bulku dhe Erlind Çekaj, Eni dhe Mishka na treguan vizualisht projektin ‘Zhvillimi i CRM-së’. Puna ime në këtë projekt ka vazhduar deri në vitin 2022. Ndërkohë që në muajin Maj të vitit 2019 ne kemi shkuar në Lituani, ku kemi qenë afërsisht 20 persona nga zyra e programimit.

Interesante është që pasi hapën filialin në Lituani, ata vazhduan të mashtronin qytetarë të ndryshëm në Evropën Perëndimore. Irisa Puca tregoi më tej për hetuesit gjermanë se ata u zhvendosën në Gjeorgji, në kryeqytetin Tbilisi. Kjo ndodhi edhe falë suksesit që kishin arritur me kompanitë e hapura më herët në Shqipëri, Maqedoninë e Veriut dhe Lituani.

Irisa Puca: Plani ynë në Lituani ka qenë të inkorporoheshim me kompaninë ‘Legal Guns’, pasi edhe ata ishin kompani programuese. Në shtator të vitit 2019, unë u largova nga Lituania dhe shkova në Gjeorgji, ku në Tbilis punova në kompaninë ‘DMG LLC’. Vajtjen në Gjeorgji ma sugjeroi Eni Speci dhe me pas Mishka me Rezzon, të cilët më thanë se në këtë vend do te krijohej një kompani më e madhe. Mbaj mend që 10 persona nga ata që ishim me punë në Lituani, shkuam më pas në Gjeorgji. Ku kam qëndruar deri në muajin janar të vitit 2021.

Lidhur me personat që ishin menaxherë dhe sipërmarrës të këtij mashtrimi, Irisa Puca thotë se ka njohur midis tyre edhe Mishkën, por nuk ka pasur asnjëherë kontakt me Amant Josifin, që konsiderohet si truri financiar i këtij mashtrimi. Josifi aktualisht ndodhet i arrestuar në Dubai dhe ka një kërkesë ekstradimi nga autoritetet spanjolle dhe shqiptare.

Irisa Puca: Pasi u ktheva në Shqipëri në janar të vitit 2021, unë fillova punë te kompania e Xhorxhia Dautit, e cila ishte kompani e nënkontraktuar nga ajo gjeorgjiane ‘DMG LLC’, ku detyra ime ka qenë programuese, dhe ku vijoja të jepja kontributin tek projekti ‘CRM’, ku edhe në këtë punë eprori im vazhdonte të ishte Eni/Hysen Speci. Lidhur me shtetasin Amant Josifi, e njoh vetëm nëpërmjet lajmeve në media, por nuk kam pasur komunikime me të. Ndërsa shtetasin Adrian Korriku e njoh pasi është bashkëjetuesi im që nga muaji Maj i vitit 2019 dhe deri më tani, ku nga kjo periudhë dhe në vijim ne kemi punuar së bashku në Lituani, Gjeorgji dhe tek Xhorxhia Dauti në Shqipëri në rolin e programuesve.

Gjatë intervistimit të saj, Irisa Puca dha dëshmi interesante edhe mbi njohjen që ajo kishte me Mikheil Biniashvilin, i cili njihet me emrin Mishka. Po ashtu, ajo tregoi edhe emrat e dytë që ata përdornin për të hyrë në kontakt me klientë të ndryshëm. Pasi klientët i fusnin në rrjet, u krijoheshin portofole dhe më pas ata i mashtronin nëpërmjet këtyre softuerëve.

Irisa Puca: Mishka, ishte epror mbi eprorët. Ai ishte rreth 50 vjeç, me pak flokë, me gjatësi mesatare, me trup normal, me origjinë izraelite ose gjeorgjiane dhe jetonte në Gjeorgji.

Për herë të parë unë Mishkën, e kam parë në Janar vitit 2019, kur është diskutuar për ‘CRM’.

Më tej e kam parë më shpesh në Gjeorgji. Gjatë punës ai ishte më i afërt me Eni Specin.

Unë kam pasur komunikime të drejtpërdrejta me email me Mishkën. Kur fillova punë në vitin 2017 në ‘Spot MT’, Mira e cila ishte menaxhere e departamentit ‘Back Office’, më tha që të zgjidhja një ‘nick name’. Dhe unë përzgjodha Iris Stone që në atë kohë. Ndërsa Endri Bulku kishte emrin e dytë Andree Bullak, Elind Çekaj mbante emrin Ryan Gossling.

Irisa Puca mohoi gjatë dëshmisë se ajo kishte përdorur aftësitë e saj profesionale për të mashtruar qytetarët në Evropë përmes këtyre platformave. Ajo tha se këto aftësi mund të ishin shfrytëzuar për qëllime të tjera nga personat me të cilët ka bashkëpunuar. Në lidhje me këtë skemë mashtrimi, u pyet edhe shtetasi Adrian Korriku, i cili rezulton të jetë bashkëjetuesi i Irisa Pucës dhe një nga programuesit e këtyre softuerëve.

Adrian Korriku: Mishkën unë e kam parë për herë të parë gjatë punës në Gjeorgji në rolin e një personi të rëndësishëm, por unë nuk kisha kontakte pune të drejtpërdrejta me ta. Gjatë kohës që kam punuar në Lituani unë isha mirëmbajtës i programit ‘CRM’ dhe se ‘Puma TS’ ishte emri i projektit të këtij programi. Unë kam punuar tek pjesa e ‘CRM’ në fillim por jo për programues për kazinotë apo për crypto-change.

Megjithatë autoritetet ligjzbatuese kanë krijuar bindjen e tyre se janë përballë një mashtrimi kibernetik me përmasa të jashtëzakonshme dhe se këta persona qoftë edhe në formën e suportit teknik, kanë vënë në shërbim njohuritë e tyre për të krijuar platforma që më thelb kishin zhvatjen e qytetarëve evropianë.

Hetimet gjermane

Zyra e Krimeve të Austrisë së Sipërme është duke hetuar për fakte të mashtrimit kompjuterik për arsye të përfitimit.

Veprimtari prej të cilës mendohet se u është shkaktuar një dëm në vlerën 504 429 00 euro, shtetasve të ndryshëm në Austri dhe jashtë saj.

Nga hetimet del se përmes kësaj veprimtarie kriminale këta persona u nxitën nga autorët të konsideronin investimin e pasurive të tyre në një mënyrë fitimprurëse, përmes reklamave në internet dhe në rrjetet sociale.

Ku më pas u janë përvetësuar shuma të ndryshme parash që gjoja do të investoheshin prej tyre, me aksione dhe valuta të kriptuara.

Sipas hetuesve që janë marrë gjatë me këtë punë, karremi fillimisht është besimi që këta brokera duhet të fitojnë të klienti dhe më pas bindja që duhet të krijojnë te ta, që këta të fundit, të investojnë dhe t’u besojnë numrat e llogarive.

Hetimet gjermane

Fillimisht viktimat tundohen të investojnë në sasi të vogla me premtimin se ‘broker-i/ndërmjetësi’, i pretenduar i faqes së investimeve, do të realizonte një fitim të madh me investimin e aksioneve dhe valutave të kriptuara.

Gjatë këtij procesi, viktimat krahas fotokopjeve të pasaportës iu dërgonin autorëve edhe fatura për të provuar vendbanimin dhe lejonin hyrjen në pajisjet e tyre elektronike përmes një softuare të mirëmbajtjes në distancë.

Qëllimi i grumbullimit të të dhënave është krijimi i llogarive të përdoruesve në platformat e këmbimit të monedhave të kriptuara.

Pas regjistrimit të suksesshëm në platformën e këmbimit, nën pretendime të rreme viktimat nxiteshin që t’i transferonin këto shuma.

Në këtë moment autori i komunikon viktimës IBAN-in e platformës së këmbimit të valutës së kriptuar të përzgjedhur më parë, për ta bërë të besueshme se shumat e paguara do t’i përcillen operatorëve të platformave të investimeve.

Këta klientë nuk u pasuruan siç mendonin, por përfunduan të zhvatur deri në një pikë pa kthim, duke u detyruar të drejtohen organeve ligjzbatuese në vendet e tyre përkatëse për ndihmë. Amant Josifi, një person kyç në këtë histori, u ndalua në Dubai më datë 6 shtator 2023 pasi ishte shpallur në kërkim nga autoritetet spanjolle për mashtrimin e 17 mijë shtetasve nga vendet e Bashkimit Europian.

Megjithatë, më pas ai u la i lirë, dhe avokati i tij tha se nuk kishte asnjë masë sigurimi ndaj tij, deri në pritje të kërkesës për ekstradim nga gjykata e La Seu. Pyetja mbetet se a do të mund të qëndrojë në liri, apo Spanja do të bëjë të mundur ekstradimin e tij./ BalkanWeb