Shqiptari Selamet Mehmetaj, i cili ndodhet në burg në Britaninë e Madhe, është kthyer sërish në vëmendje të mediave vendase.
Gazeta “Daily Mail” shkruan se 30-vjeçari i dënuar me 4 vite e 6 muaj burg për pjesëmarrje në një bandë kriminale, vijon të postojë foto nga qelia e burgut.
I cilësuar si bosi i drogës, Selamet Mehmetaj ka postuar imazhe të tij në rrjetet sociale disa ditë pasi me sa duket kishte akses në një celular që dyshohet se ishte futur kontrabandë në burg.?
Pavarësisht se është burgosur, Mehmetaj është rikthyer në rrjetet sociale dhe duket se po e mban veten me të mira që kur u dërgua në burg. Në fotot e postuar shihet se shqiptari ekspozon muskujt, i cili ka lënë edhe një mbishkrim në shqip ku thuhej: “Jeta është si një film”.
Postimi në Instagram / Foto: Daily Mail
Sipas mediave britanike ai ka veshur një bluzë të bardhë nga marka e tij e cila përmban tre shenja të pjerrëta në njërin krah.
Daily Mail shkruan se shqiptari ka postuar në platformën Tik tok makinën e tij, që mesa duket kërkon ta shesë, teksa thuhet se autoritetet kanë nisur një hetim për shqiptarin, pas denoncimit të bërë nga mediat për mbajtjen e telefonit brenda qelisë.
Në vitin 2021, Mehmetaj ra pre e një investigimi nga media britanike, që e regjistroi atë, teksa rrëfente krimet e rënda që kishte kryer në Britani. Ai cilësohet si “Zoti i drogës”, pasi 30-vjeçari drejtonte dy ferma kanabisi të fshehura në shtëpitë periferike të Londrës veriore, ku kishte rekrutuar emigrantë të paligjshëm.
Nga atje ai shpërndante drogë me vlerë miliona paund në vit në të gjithë Mbretërinë e Bashkuar së bashku me vëllain e tij të vogël Dior, i cili ishte vetë një azilkërkues që i ishte refuzuar kjo kërkesë. Mehmetaj, i cili njihet edhe si Memzo, kishte përdorur më parë llogarinë për t’u mburrur për stilin e jetës së tij luksose.
