Donald Trump ka nënshkruar një urdhër ekzekutiv që synon t’i japë fund “qytetarisë nga lindja” në SHBA, një praktikë që garanton automatikisht shtetësinë amerikane për këdo që lind në territorin e SHBA-së. Kjo praktikë buron nga Amendamenti i 14-të i Kushtetutës Amerikane, i cili përcakton se “të gjithë personat e lindur ose të natyralizuar në Shtetet e Bashkuara janë shtetas të SHBA-së”.
Kjo politikë, e miratuar në 1868 pas Luftës Civile, synonte të zgjidhte statusin e ish-skllevërve të lindur në Amerikë. Gjykata e Lartë, në rastin Wong Kim Ark vs. United States në 1898, e konfirmoi se qytetaria nga lindja vlen edhe për fëmijët e emigrantëve, pavarësisht statusit të prindërve të tyre.
Kundërshtarët e kësaj praktike argumentojnë se ajo inkurajon emigracionin e paligjshëm, me raste si “turizmi i lindjes” apo lindja e të ashtuquajturve “anchor babies”. Sipas të dhënave, në 2016 rreth 250,000 foshnja kanë lindur nga prindër emigrantë të paautorizuar në SHBA. Heqja e qytetarisë nga lindja mund të rrisë numrin e emigrantëve pa dokumente në 4.7 milionë deri në vitin 2050.
Mbi 30 vende, përfshirë Kanadanë, Meksikën dhe Malajzinë, aplikojnë qytetarinë automatike përmes parimit jus soli (e drejta e tokës), ndërsa vende si Mbretëria e Bashkuar dhe Australia e kufizojnë atë, duke e lidhur me statusin e prindërve./korrieri
