Hetuesit e kundërzbulimit ukrainas deklaruan këtë të martë se parandaluan një plan të agjentëve rusë për të vrarë presidentin Volodymyr Zelensky dhe zyrtarë të tjerë të nivelit të lartë.
Dy kolonë në Gardën Shtetërore të Ukrainës, e cila mbron zyrtarët e lartë, u arrestuan nën dyshimin për tradhti për zbatimin e planit, tha shërbimi i sigurimit shtetëror të Ukrainës në një deklaratë, duke shtuar se komploti ishte hartuar nga Shërbimi Federal i Sigurisë i Rusisë.
Moska nuk ka reaguar ende ndaj deklaratës, sipas së cilës kolonelët ishin rekrutuar përpara pushtimit të Ukrainës nga Rusia në shkurt të vitit 2022.
“Sulmi terrorist, i cili supozohej të ishte një dhuratë për [presidentin rus Vladimir] Putin, ishte me të vërtetë një dështim i shërbimeve speciale ruse”, tha Vasyl Maliuk, kreu i Shërbimit të Sigurisë Shtetërore të Ukrainës.
Shtetet e Bashkuara dhe shumica e vendeve të Bashkimit Evropian anashkaluan ceremoninë e betimit të Putinit për mandatin e 6-të këtë të martë..
Zelensky tha në vitin 2022 se kishte pasur të paktën 10 përpjekje për ta vrarë atë. Një polak u arrestua në prill me akuzat se punonte me inteligjencën ushtarake të Rusisë GRU në një komplot të dyshuar për të vrarë presidentin ukrainas.
Zelensky po udhëheq përpjekjet e Ukrainës për të luftuar agresionin rus ndërsa lufta hyn në vitin e saj të tretë.
