Dosja Partizani në SPAK , ndërtimi i kompleksit, Andia Pustina shfaqet edhe në Bashki, Basha çoi INUV (GJOBA)
Detaje të tjera janë zbuluar nga dosja e Strukturës së Posaçme kundër Korrupsionit dhe Krimit të Organizuar për dosjen “Partizani”. Në disa prej faqeve të dosjes, zbulohet roli që ka pasur Lulzim Basha si kryetar i Bashkisë së Tiranës për dhënien e lejes së ndërtimit. Sipas SPAK, po në të njëjtën periudhë që Basha ishte në krye të Bashkisë së Tiranës, më 21.09.2011, Andia Pustina emërohet drejtore e Drejtorisë së Planifikimit Strategjik, ndërkohë që mbante edhe kontabilitetin e shoqërisë “Homeplan sh.p.k.”. Pustina, është marrë e pandehur nga SPAK po për dosjen “Partizani”, për veprën penale ”pastrim parash”.
Në këtë kohë, Fatmir Bektashi, si administrator i shoqërisë Kontakt sh.p.k. dhe Xhimi Begeja si përfaqësues i pronarëve të truallit (po nuk evidentohet ndonjë prokure), i janë drejtuar kryetarit të Bashkisë Tiranë Lulzim Basha, me kërkesë për lëshim akti ku kërkojnë llogaritjen dhe nxjerrjen e detyrimit që shoqëria ka për të paguar, si dhe zbardhjen e akteve administrative të miratuara nga KRRT e Bashkisë Tiranë.
“Me autorizimin e nënshkruar nga administratori i përgjithshëm Etion Kapedani për lejen e ndërtimit të objektit bllok banimi dhe shërbimesh 5, 7 dhe 9 kat me 2 kat parkim nëntokë (faza A dhe faza B) në rrugën Frosina Plaku, në pronësi të familjarëve Begeja, në favor të subjektit ndërtues Kontakt, ky i fundit ose investitori, autorizohen të kryejnë pagesën gjithsej në vlerën 44 202 504 lekë,“-shkruhet në dosjen e SPAK.
Pas detyrës së parë, më datë 06.02.2012 Andia Pustina lë postin e drejtoreshës së Planifikimit Strategjik dhe emërohet si drejtore e Përgjithshme e Drejtorisë së Përgjithshme të Taksave dhe Tarifave Vendore, sërish pranë Bashkisë së Tiranës. Ndërsa më datë 06.02.2012, komandohet edhe drejtore e Drejtorisë së Planifikimit Strategjik në Bashkinë e Tiranës.
2 ditë pas emërimit të Pustinës në detyrën e re, me datë 08.02.2012 në emër të shoqërisë “Kontakt sh.p.k.”, administratori Fatmir Bektashi i shkruan kryebashkiakut të asokohe, Lulzim Bashës dhe e njofton me vendimin gjyqësor për shuarjen e detyrimit për taksën me shumë: 39 883 803 lekë. Më një shkresë tjetër që mban datën 24.02.2012, shoqëria Kontakt sh.p.k. i vë në dispozicion kryerjen e pagesës dhe kërkojnë zbardhjen e lejes së ndërtimit.
“Vetëm rreth 20 ditë pas emërimit, shtetësja Andia Pustina, në cilësinë e drejtorit të përgjithshëm, duket se është marrë me praktikën e shoqërive Homeplan dhe Kontakt, siç dokumentohet në vërtetimin e lëshuar prej saj, për likujdimin e taksës së ndikimit në infrastruktrë për vlerën 4 318 701 lekë të subjektit Kontakt, me nr. 480 prot dt 27.02.2012,“-thekson SPAK në dosje. Nga autorizimi nr. 2216, dt.25.04.2012 që shoqëria Kontakt sh.p.k. ka lëshuar për të autorizuar av. Sokol Barçi për përfaqësimin pranë Bashkisë Tiranë në procedurën për zbardhjen e lejes së ndërtimit të miratuar nga KRRT e Bashkisë Tiranë, konstatohet se ndërtimet janë kryer në shkelje të kushteve të lejes së parë. Po atë ditë është ushtruar kontroll nga ana e INUV të Bashkisë dhe është vendosur një gjobë për punime të kryera në shkelje të kushteve të lejes së miratuar.
Gjoba me vlerë 100 mijë lekë (të reja) është paguar nga Suzana Aliaj. Në të njëjtin fragment shkruhet se i njëjti person ka dërguar sërish letër sqarimi.
“Na është dashur që të bënim ndryshime në projekt por meqënëse Bashkia e Tiranës ishte bërë pengesë për zbardhjen e lejes nuk e kanë pasur mundësinë të kërkonin miratimin e ndryshimit të projektit.”
Me një kërkesë për kryerje punimesh, më datë 27.04.2012 shoqëria Kontakt sh.p.k. e përfaqësuar nga Sokol Barçi, ka paraqitur formularin për kërkesë për kryerje punimesh. 3 ditë më vonë, 30.04.2012, në një shkresë të nënshkruar nga drejtori i përgjithshëm i Drejtorisë së përgjithshme të Planifikimit dhe Zhvillimit të Territorit Florian Pustina, drejtuar Fatmir Bektashit dhe për dijeni INU, informohet se, u mor në dorëzim kërkesa për ndryshim të projektit të zbatimit.
“Procedura e ndjekur për këtë leje, raportuar përsa më sipër në memo, është kryer konform urdhëresës nr. 275 datë 06.04.2012 të Kryetarit të Bashkisë Tiranë,”-vëren SPAK.
Fatmir Bektashi dhe Jamarbër Malltezi nënshkruajnë një tjetër kontratë para noteres Laura Pustina, ku bien dakord të riaktivizojnë akt marrëveshjen për ndërtimin e kompleksit Begeja 6000, të cilën e kishin pezulluar. Aktivizimi duket se është filluar pasi palët jo vetëm që kishin marrë zbardhjen e lejes së ndërtimit që e kishin përfunduar, por kishin bërë edhe ndryshimet që donin.