Emisioni Në Shënjestër në News24, i gazetares Klodiana Lala, ka hedhur dritë mbi ngjarjen e rëndë të ndodhur në shkurt të vitit 2009, kur u gjet i masakruar Osman Berberi, në atë kohë vetëm 27 vjeç.
Babai i një vajze katër vjeçare, që thuhet se u rrëmbye mesditën e datës 19 shkurt 2009. Nga persona të veshur si policë, brenda një lokali, fare pranë banesës së tij në Kodër Kamëz. Vetëm pak orë, pasi një telefonatë urgjente, e kishte nxjerrë herët në mëngjes nga banesa.
Për herë të parë emisioni ‘Në shënjestër’, pas kaq shumë vitesh, do të përpiqet të hedhë edhe njëherë dritë mbi rrëmbimin, torturimin dhe mënyrën se si gjet i masakruar, 27-vjeçari, Osman Berberi, më datë 28 shkurt 2009, rreth orës 11.00 të mesditës, në këmbët e ‘Urës me Harqe’ në Milot, apo ndryshe e njohur si Ura e Zogut.
Nëna e viktimës, thotë se Alban Skonja, kishte një lidhje të ngushtë me tezen e tij, Luçianën. Në këtë rast, nëna e Odetës.
Por këtu mesa duket historia fillon edhe bëhet gjithmonë dhe më e koklavitur. Pasi ndërsa Odeta, qëndronte në shtëpinë e nënës së saj, sipas dëshmisë së nënës së Osmanit, gjatë kësaj kohe në këtë banesë, hynin edhe dilnin edhe persona të tjerë. Që nuk kishin lidhje gjaku me këtë familje.
Midis këtyre personave, të cilët nëna e Osmanit i ka identifikuar me emra të përveçëm, janë edhe Ismail Dishuka, shoku i Alban Skonjës. Një burrë me emrin Bujar. Dhe një tjetër me emrin Meli.
Në kohën që Osmani ishte në Greqi, Odeta rrinte tek nëna e saj, Luçiana, dhe ajo vinte në shtëpi, vetëm kur Osmani kthehej nga jashtë. Unë Ismail Dishukën e kam njohur tek shtëpia e Luçianës, pasi rrinte aty së bashku me Alban Skonjën dhe me një person tjetër nga Fushë-Kruja, i cili quhej Bujar, babai i të cilit punonte me kamion duke transportuar zhavorr.
Gjithashtu në shtëpinë e Luçianës vinte shpesh dhe një djalë tjetër i cili quhej Meli dhe ishte nga Laçi. Këto të gjithë rrinin ne shtëpinë e Luçianës, ku në atë kohë në këtë banesë ishte dhe Odeta.
Pasi siç e thashë Odeta kishte shkuar në shtëpinë e nënës së saj Luçianës deri ditën që Osmani u largua nga shtëpia më datë 19 Shkurt 2009.
Por mesa kuptohet prania e vazhdueshme e këtyre personave në banesën e së vjehrrës, aty ku qëndronte edhe bashkëshortja gjatë mungesës së tij, duket se i kishte rënë në sy për keq edhe Osmanit.
Ajo që bën përshtypje në gjithë këtë histori është se Alban Skonja dhe Ismail Dishuka, nuk kanë marrë pjesë në ceremoninë e varrimit të Osman Berberit.
Por ndërsa grupi hetues u ndal më së shumti te pista e vrasjes brenda atij që quhet rrethi farefisnor i bashkëshortes së Osmanit, është me interes të shikojmë edhe dëshmitë e tjera.
Sipas rrëfimeve së dhënë nga nëna e tij, para se të kthehej në Shqipëri, Osmani çuditërisht e kishte lënë pasaportën e tij në Greqi, në familjen e një gruaje, me të cilën ai thonte që kishte një lidhje jashtëmartesore.
Por që çuditërisht pas gjetjes së trupit të tij të vrarë dhe të masakruar, del se disa persona po kërcënonin vazhdimisht familjen që mbante pasaportën e Osmanit, në Greqi.
Me qëllim që këta të fundit, t’u jepnin pasaportën e tij, me siguri për ta zhdukur.
Djali im Osmani, kur u kthye nga Greqia më datë 11 Shkurt 2009, nuk e kishte pasaportën e tij me vete.
Unë e pyeta dhe ai më tha se: ‘Ma kanë mbajtur te ajo shtëpia ku më ka prezantuar Skënder Ulliri, pra tek shtëpia e Vandi Allkurtit.
Fill pas ndodhisë që i ngjau Osmanit, nëna e tij thotë se nga Greqia e mori në telefon, pikërisht vetë Vandi Allkurti.
Mua më mori në telefon nga Greqia, Vandi Allkurti rreth datave 7 apo 8 Prill 2009.
Ajo më tha: ‘Jam e dashura e Pushit (Osmanit)’.
Unë e pyeta se nga kush e kishte marrë numrin e telefonit tim dhe ajo më tha: ‘Kush kërkon e gjen…’
Unë atëherë e pyeta se si ka ndodhur vrasja e Osmanit dhe nga e more vesh ti që është vrarë. Ajo më tha se vrasjen e Osmanit e kam marrë vesh nga Skënder Ulliri.
Unë e pyeta nëse ajo, pra Vandelina i njihte shokët e djalit tim Osmanit dhe ajo më tha:’Unë kam pak kohë që e njoh Osmanin, biletën ja kemi prerë ne për të ardhur në Shqipëri’.
Unë e pyeta prapë nëse djali im Osmani kishte pasur ndonjë sherr me ndonjë person dhe ajo më tha se: ‘Osmani nuk donte të vinte fare në Shqipëri pasi kishte sherr me njerëzit e gruas së tij’.
Duke u bazuar gjithmonë në dëshminë e nënës së viktimës, ajo tregon se gjatë bisedës telefonike, e pyeti Vandin edhe për pasaportën e Osmanit.
Unë e pyeta Vandin se ku e kishte lënë Osmani pasaportën, dhe ajo më tha se ai ia kishte lënë vetë burrit tim, pasi gjoja do të kthehej shpejt përsëri në Greqi.
Vetëm 5 ditë pas kësaj bisede telefonike, nëna e Osmanit, tregoi për grupin hetues, se bashkëshorti i Vandelina Allkurtit, i ka dërguar nëpërmjet një shoferi autobusi që bënte linjën e transportit Greqi-Shqipëri, pasaportën e Osmanit.
Por ndërsa Vandelina Allkurti dhe bashkëshorti i saj Ibrahimi, me qëndrim në Greqi, nuk rezultojnë të jenë marrë asnjëherë në pyetje në lidhje me këtë histori, nëna e Osmanit, tregoi atë kohë në polici, se Vandi i kishte treguar edhe emrin e personit që e kërcënonte nga Shqipëria.
Vandelina Allkurti më ka thënë në telefon se pasaportën e ka lënë vetë Osmani tek shtëpia ime, por po më kërcënojnë burrin ca burrelsa, dhe më përmendi emrin e Gëzim Latës.
I cili i kishte thënë që të zhdukte pasaportën e Osmanit.
Por siç thamë edhe më herët, diçka nuk shkonte brenda familjes së bashkëshortes së viktimës.
Gjë që duket se i kishte rënë në sy edhe Osmanit.
Këtë histori, nëna e tij, thotë se ia ka treguar vetë një nga xhaxhallarët e bashkëshortes së viktimës.
Gjatë një takimi që kishte patur rastësisht me të, gati tri vite nga vrasja e Osmanit.
Nëna e Osmanit, Diamanta Hima
Më datë 22 Mars 2012, rreth orës 18,00, rastësisht unë takova në qendër të Institutit Bujqësor Tiranë xhaxhain e Odeta Xhanit (Berberit) i cili quhet Dali Xhani.
Pasi u përshëndeta me të, unë e ftova për kafe në një lokal aty pranë. Gjatë bisedës, Daliu, doli tek vrasja e djalit tim Osmanit, ku më tha se ai ka qenë dhëndrri më i mirë i fisit tonë.
Ai më tha po kështu se po të ishte gjallë vëllai i tij Veliu, babai i Odetës, nuk do të kishin ndodhur këto që ndodhën.
Po për çfarë e kishte fjalën xhaxhai i Odetës, gjatë bisedës me nënën e Osmanit?
Kur thoshte që po të ishte gjallë vëllai i tij, nuk do kishte ndodhur ato që ndodhën, duke lënë të kuptohet vrasjen e Osmanit.
Gjatë bisedës Daliu, më tha se njëherë Osmani i ishte hapur dhe i kishte treguar se si ai kishte gjetur Luçianën, nënën e Odetës, rastësisht në një lokal në Tiranë, të ulur në një tavolinë me tre gota tekila përpara.
Siç më tej Osmani kishte treguar, ai ishte afruar te tavolina e Luçianës dhe e kishte pyetur: ‘Me kë je ulur këtu’?
Ky moment i papërshtatshëm, në të cilin Osmani gjeti vjehrrën e tij dhe ajo çfarë pa pas pak minutash, duket se mund të ketë qenë fillimi i një sherri që gjasat janë që të ketë pasur një fund të hidhur.
Këtë të paktën i ka lënë të kuptohet xhaxhai i Odetës, në rrëfimin e tij, nënës së bashkëshortit të saj.
Ngjarje e cila duket se e ka tërbuar Osmanin.
Gjatë bisedës Daliu më tregoi, se Luçiana nuk kishte folur por ishte munduar që të ngrihej nga tavolina, por Osmani nuk e kishte lënë dhe kishte porositur diçka për vete.
Pas dhjetë minutash Osmani kishte parë duke zbritur nga moteli, pasi lokali ishte me motel, Aurora Xhanin, e cila është vajza e Luçianës dhe kunata e Osmanit, me një burrë ku nga mosha ishte babai i saj.
Në këtë moment Osmani ishte ngritur nga tavolina dhe kishte kapur nga krahu këtë burrin që po zbriste së bashku me Aurorën dhe e kishte pyetur se kush ishte ai.
Ai i kishte thënë që jam Kujtimi nga Laçi, burri i Tashës, dhe se ishte ngjitur lart në motel për t’i gjetur një punë Aurorës.
Siç e thamë edhe më sipër kjo gjë e kishte nxehur aq shumë Osmanin, sa i kishte kërkuar vjehrrës së tij, që të mos i shkelte më në shtëpi.
Daliu më tha se kjo gjë e kishte nevrikosur edhe më shumë Osmanin dhe ky ishte afruar tek tavolina e Luçianës dhe e kishte pështyrë në fytyrë duke i thënë: ‘Mos të shoh më në shtëpi as ty dhe as Aurorën’, dhe ishte larguar.
Por përpara grupit hetues nëna e Osmanit, tha se këtë ngjarje asaj ia kishte treguar edhe vetë i biri.
Madje, ajo tregoi edhe se si djali i saj, me tu kthyer atë ditë në banesë, dhunoi bashkëshorten, Odetën.
Të gjitha këto që më tregoi Dali Xhani, xhaxhai i Odetës, mua mi tha edhe vetë Osmani.
Natën që u kthye në shtëpi, pasi kishte parë Aurorën në lokal, ai filloi të rrahë gruan e tij, Odetën.
Unë i ndërhyra dhe i thashë përse po e rreh gruan.
Osmani mu kthye dhe më tha: ‘Këto moj mam janë k…. , nuk i dua në shtëpi’.
Dhe më tregoi të gjithë historinë që unë e përshkrova.
Sipas nënës së tij, vetëm disa ditë pas kësaj ngjarje, në shtëpinë e tyre kishin trokitur Luçiana së bashku me Aurorën.
Mesa duket për t’i vënë kapak kësaj pune.
Osmani tentoi që t’i nxirrte nga shtëpia të dyja, ku Aurorën e la jashtë. Në shtëpi ndejti Luçiana dhe ajo i tha Osmanit: ‘Të lutem mos mi ndaj fëmijët se nuk është gjë kjo punë’.
Por dyshime mbi shkaqet e vrasjes të së birit, duket se nuk ka pasur vetëm nëna e tij.
Por edhe të afërm të ngushtë të bashkëshortes së Osmanit.
Të cilët linin të kuptonin se vrasja kishte ardhur pas problemeve që kishin shpërthyer brenda familjes së tyre.
Gjatë kohës që kam marrë trupin e vdekur të Osmanit në shtëpi dhe po qaja i kam thënë djalit: ‘Të keqen mami ishalla nuk është ndonjë dorë që mami yt i ka dhënë bukë’.
Gjatë bisedës që po bëja atë ditë me Dali Xhanin, teksa po pinim kafe tek Instituti Bujqësor, ai më tha se: ‘Kur unë dëgjova këto fjalë teksa po qaje djalin tënd, jam ngritur, kam dalë dhe i kam thirrur direkt Aurorës, dhe i kam thënë: ‘Aurorë, a thua se kjo gjë mos është muhabeti jot me Kujtimin dhe e keni bërë ju këtë punë’?
Sipas Daliut, Aurora nuk i ktheu përgjigje dhe ishte futur përsëri brenda në shtëpi, aty ku ishte kufoma e Osmanit.
Daliu i tregoi më tej nënës së Osmanit, se me të parë këtë reagim të mbesës së tij Aurorës, ai kishte marrë vëllain tjetër dhe ishte larguar nga morti.
Daliu më tha se pas kësaj bisede me Aurorën, ai kishte thirrur pranë vetes, vëllain e tij Lulëzim Xhanin, xhaxhain e madh të Odeta Berberit, ku i kishte thënë: ‘Hajde or vëlla të ikim, se qenka bërë name, se këto llafe që po thotë Diamanta janë për neve’.
Sipas nënës së viktimës, që nga ajo ditë morti, dy xhaxhallarët e Odetës, bashkëshortes së Osmanit, nuk erdhën më në shtëpinë e saj.
Madje, pas një debati të nxehtë midis tyre, kanë prishur marrëdhënien dhe me Luçianën, gruan e ve të vëllait të tyre të ndjerë, Veliut.
Disa kohë pas vdekjes së djalit tim Osmanit, dy xhaxhallarët e Odetës, kanë shkuar në shtëpinë e Luçiana Xhanit, dhe i kanë thënë: ‘A mos e ke bërë ti këtë punë dhe pasi kanë bërë shumë debate janë larguar nga shtëpia e saj dhe nuk flasin më që nga ajo ditë me të.’
Por duket se dyshime mbi autorët e mundshëm të vrasjes së Osmanit, nuk kanë pasur vetëm xhaxhallarët e bashkëshortes së tij.
Por edhe vetë një nga dajat e Odetës, ose një nga vëllezërit e Luçianës, nënës së saj.
Më datë 21 Korrik 2010, rreth orës 17.30-18.00 unë kam folur në telefon me vajzën e dajës së Alban Skonjës e cila quhet Klodi Bushkashi. E cila është vajza e Halil Bushkashit dhe që banon në Durrës me qira.
Në fakt unë i rashë Halilit, por në telefon më doli Klodi.
Gjatë bisedës unë e pyeta Klodin, nëse dinte diçka për vrasjen e Osmanit.
Ajo më tha se me të dëgjuar e kishte se dikush i kishte thënë babait të saj Halilit, se kur Osmani është kthyer nga Greqia, ai ka gjetur në shtëpinë e vjehrrës së tij, Luçianës, aty ku Odeta qëndronte gjatë kohës që ai ishte jashtë, Alban Skonjën së bashku me disa shokë të tijët.
Sipas kushërirës së Alban Skonjës, por që ishte njëkohësisht edhe vajza e dajës së bashkëshortes së Osmanit, për këtë arsye ky i fundit thuhet se debatoi ashpër me vjehrrën e tij.
Pasi Alban Skonja dhe shokët e tij u larguan nga shtëpia e Luçiana Xhanit, Osmani nisi të debatonte ashpër me Luçianën dhe me bashkëshorten e tij Odetën.
Osmani i tha Luçianës se çfarë janë këta njerëz që ti ke futur në shtëpi?
Ai mësohet se i ka thënë vjehrrës së tij dhe Odetës, se po pashë më njerëz këtu, unë do ta lej Odetën fare.
Po sipas Klodit, pas këtij episodi, mësohet se ditën kur Osmani u zhduk, Alfred Skonja ka shkuar me Aurel Xhanin poshtë pallatit të tij, dhe e kanë thirrur për të pirë kafe.
Alfred Skonja, që rezulton të jetë vëllai i Alban Skonjës.
Më tej Klodi më shpjegoi se atë ditë që humbi Osmani, te shtëpia jote ka ardhur Alfred Skonja së bashku me Aurel Xhanin.
Ata e thirrën Osmanin që të dilte jashtë me preteksin se e priste Alban Skonja tek lokali për të pirë kafe dhe për t’i dhënë një drekë.
Pasi kanë shkuar te lokali, aty kanë ardhur 4-5 veta dhe janë paraqitur si grupi i gatshëm, të cilët i kanë thënë që të paguante kafet në lokal. Por Osmani u ka thënë se kam vetëm 400 lekë të vjetra që mi ka lënë plaka.
Sipas asaj që Klodi i tha nënës së Osmanit, personat e veshur si policë të grupit të gatshëm, nuk ishin askush tjetër, vetëm se shokë të Alban Skonjës.
Gjatë bisedës Klodi më tha, se këta persona ishin shokë të Alban Skonjës.
Ata e kishin marrë prej krahu Osmanin, e futën në makinë dhe e dërguan në Kamëz ku rrinte me qira Alban Skonja.
Shtëpi të cilën ia kishte gjetur Luçiana Xhani, tezja e tij.
Por duket se thrilleri nuk përfundon këtu.
Pasi siç shikohet edhe më poshtë, gjatë bisedës, vajza e dajës së bashkëshortes së Osmanit, disponon të gjithë informacionin, se si u vra ky i fundit, nga Alban Skonja.
Informacion të cilin thotë se e ka dëgjuar nga bisedat që ka bërë me babain e saj, Halilin.
I cili, sipas Klodit e kishte mësuar nga njerëz të tjerë.
Por nuk i kishte dhënë emër të përveçëm, se nga kush konkretisht.
Klodi më tha në telefon se Luçiana dhe Odeta e dinë shtëpinë se ku e vranë Osmanin, Albani së bashku me shokët e tij.
Ajo më tha se nga shtëpia atë ditë që ka humbur Osmani e ka nxjerrë Aurel Xhani, vëllai i Odetës, si dhe Alfred Skonja i cili është vëllai i Alban Skonjës.
Të cilët e kanë marrë dhe e kanë dërguar në një shtëpi në Kamëz që ishte marrë me qira nga Alban Skonja dhe aty e kanë vrarë.
Klodi më tha se pas vdekjes së Osmanit, e kemi pyetur Luçianën se çfarë bën Diamanta, nëna e Osmanit.
Luçiana na tha se Diamanta është çmendur dhe po rreh njerëzit e shtëpisë.
Klodi më tha se tani po ta mbyll telefonin se po vjen babi, dhe të lutem mos më nxirr mua për këto që të thashë se babi ndryshe më vret.
Pasi e mbylli bisedën e gjatë telefonike me kushërirën e bashkëshortes së djalit të saj tashmë të vrarë, nëna e Osmanit, tentoi të bisedojë me Halilin, babain e saj.
Por ky i fundit, i cili sapo kishte dhënë shpjegime në polici, pavarësisht insistimit të nënës, nuk preferoi të jepte të dhëna mbi vrasjen e Osmanit.
Pasi mbylla bisedën me Klodin, pesë minuta më vonë i telefonova babait të saj, Halilit.
Por ai nuk reagoi fare në lidhje me vdekjen e Osmanit.
Por vetëm më tha se sot jam mik në Bulqizë dhe nuk mund të flas, por po përshëndetemi.
I vetmi që ka pasur lidhje me viktimën, si në Greqi, ku kishin ndejtur së bashku herën e fundit, ashtu edhe në Shqipëri.
Personi me të cilin Osmani shoqërohej edhe gjatë kohës së tij të fundit të kthimit në Shqipëri.
Osmani, herën e fundit iku në Greqi, së bashku me Besnik Ndoun.
Ky i fundit u kthye në Shqipëri, një javë para se djali im të vinte nga Greqia.
Kur Besniku u kthye nga Greqia, ai më tha se kishte fjetur një natë në shtëpinë e Ramazan Tabakut, burrit të motrës sime.
Ku edhe festën e Vitit të Ri, e kishin kaluar në këtë shtëpi.
Kur u kthye nga Greqia, Osmani nuk komunikonte me askënd, vetëm me Besnik Ndoun.
Një natë Besniku dërgoi në shtëpinë tonë një djalë për të kërkuar Osmanin.
Unë i thashë se për çfarë e kërkonte Osmanin. Ai më tha se e do Besniku, por nuk e di arsyen.
Një ditë para se Osmani të zhdukej, Besniku i kishte kërkuar atij një palë atlete, të cilat ai ia kishte falur.
Po kështu një natë apo dy para se Osmani të zhdukej, një makine e zezë me disa persona brenda saj erdhën dhe e thirrën, por unë nuk e lashë që ai të dilte nga shtëpia.
Edhe disa ditë para se Osmani të humbiste, Besnik Ndou ka ardhur dhe e ka thirrur në shtëpi.
Por vajza e Osmanit kishte dalë dhe i kishte thënë që babi nuk është në shtëpi.
Di që atë natë Besnik Ndou ishte i pirë.
Dyshime mbi rolin e Besnikut, si bashkëpunëtor në vrasjen e djalit të saj, ka hedhur edhe nëna e tij.
Diamanta Hima
Unë kam burrin e motrës sime që jeton në Greqi.
***
Dy ditë para se Osmani të kthehej në Shqipëri, Ramazan Tabaku, ka gjetur në shtëpinë e tij një çantë. Aty ai ka parë disa pako, që i kishte njohur si drogë. Në këtë moment Ramazani, ka marrë në telefon Osmanin, dhe i ka thënë që të vinte të merrte çantën dhe t’ua jepte atyre që e kanë. Osmani kishte shkuar në shtëpinë e Ramazanit, i shoqëruar nga dy persona të tjerë, të cilëve nuk ua di emrat. Në këtë moment Ramazani kishte mbyllur derën e shtëpisë së tij, duke e përzënë Osmanin nga banesa.
Osmani në darkë më mori në telefon dhe më tha se Ramazani e kishte përzënë nga shtëpia.
Pasi mbylla telefonin me Osmanin, unë mora Ramazanin në telefon dhe i thashë që ta mbante në shtëpi, por ai mu përgjigj se ti nuk i di të gjitha.
Por i pyetur në lidhje mbi këto thënie të nënës së Osmanit, Ramazan Tabaku, dha të tjera motive mbi arsyet e prishjes me djalin e saj, gjatë kohës që ky i fundit qëndronte në banesën e tij në Athinë.
Ramazan Tabaku
Herën e fundit që Osmani erdhi në Greqi ishte muaji shtator apo tetor i vitit 2008 dhe qëndroi aty deri në mesin e muajit shkurt të vitit 2009.
Gjatë gjithë kësaj kohe Osmani qëndroi në shtëpinë time.
Ai punonte me ditë, ndërsa dy muajt e fundit para se të vinte në Shqipëri punoi shumë pak dhe nuk kishte as të holla.
Unë pothuajse e kam ushqyer, ku dhe qiranë e shtëpisë nuk e paguante pasi nuk kishte para.
Ai pagoi qiranë e shtëpisë vetëm në muajin dhjetor të vitit 2008, pasi dhe unë gjatë këtij muaji isha pa punë.
I pyetur se cilat ishin motivet për të cilat e largoi Osmanin nga banesa e tij në Greqi, Ramazan Tabaku tha se shkak u bënë telashet që ky i fundit po i krijonte me miqtë e tij, gjatë kohës së qëndrimit në shtëpi.
Ramazan Tabaku
Arsyeja që unë i thashë Osmanit, që të largohej nga shtëpia ime, ka të bëjë me faktin që ai nuk po punonte më.
Arsyeja tjetër ishte se Osmani filloi duke u bërë pak grindavec. Ku një natë në shtëpi, ku kisha për darkë një shokun tim, filloi ta provokonte në pije e sipër dhe kërkonte të ngatërrohej me të.
Unë i thashë të nesërmen Osmanit që po të lej pesë ditë afat dhe të më largohesh nga shtëpia. Gjej punë dhe shtëpi ku të duash. Osmani nuk e priti mirë këtë që unë i thashë.
Gjatë rrëfimit në polici, Ramazan Tabaku, i cili mbante në shtëpinë e tij në Athinë, Osmanin, foli edhe për lidhjen që ky i fundit kishte krijuar me një grua të quajtur Vandi.
Ramazan Tabaku
Osmani kishte filluar të pinte dhe nuk punonte më.
Ai ishte lidhur dhe me një grua e cila kishte dy fëmijë me të cilën e kishte prezantuar Skënder Ulliri, i cili këtë grua e kishte kushërirën e tij.
Këtë grua e thërrisnin Vandi, dhe burri i saj quhej Ibrahim.
Vitin që shkoi, Vandi dhe Ibrahimi erdhën në shtëpinë time.
Kur ata erdhën për vizitë, Osmani ishte në shtëpi. Dhe unë u shtrova një darkë të vogël.
Osmani më tha se kjo gruaja është kushërira e Skënder Ullirit dhe ky është burri i saj.
Pas kësaj darke Vandi nuk erdhi më në shtëpinë time, ndërsa burri i saj Ibrahimi erdhi dhe dy-tre herë të tjera. Ku kemi pirë nga një kafe, së bashku me Osmanin.
Sipas Ramazanit, ishte vetë Osmani që i kishte treguar për lidhjen që kishte me Vandin.
Por gjatë intervistimit, Ramazani, lë të kuptohet se kjo mund të ketë qenë edhe një vetëmburrje e Osmanit.
Dhe ndoshta mund të mos ketë patur asgjë të vërtetë në këtë histori.
Ramazan Tabaku
Lidhjen me Vandin, ma tregoi vetë Osmani.
Ai më tha se Vandi i ishte vardisur vetë atij.
Një natë, në muajin janar, në shtëpinë time erdhi Besnik Ndou.
Osmani nuk ishte aty. Gjatë bisedës Besniku më tha se Osmani i kishte treguar se kishte një të dashur që quhej Vandi.
Lidhur mbi misterin e pasaportës që Osmani, kishte lënë në Greqi, dhe arsyet përse e kishte bërë një gjë të tillë, Ramazani shpjegon se ai e kishte lënë në shtëpinë e Vandit dhe Ibrahimit.
Dhe se u kishte thënë këtyre të fundit se do të kthehej ta merrte pas dy muajsh.
Ramazan Tabaku
Në muajin shkurt 2009 në kohën që Osmani do të vinte për në Shqipëri, atë e ka përcjellë me makinën e tij Ibrahimi dhe një djalë që e thërrisnin Visi, ku dhe paratë e biletës së udhëtimit ia kanë grumbulluar këta që e përcollën.
Unë e di që Osmani pasaportën e ka lënë në shtëpinë e Ibrahimit dhe të Vandës. Dhe u ka thënë që do kthehet ta marrë pas një apo dy muajsh.
Siç tregon më tej Ramazani, pas vdekjes së Osmanit, në shtëpinë e tij shkoi Ibrahimi.
I cili ishte interesuar të dorëzonte pasaportën te nëna e Osmanit.
Ramazan Tabaku
Pas vdekjes së Osmanit, Ibrahimi kërkoi të vinte në shtëpinë time, për problemin e pasaportës.
Me qëllim që të ma jepte mua për ta dërguar në Tiranë tek familja e tij.
Por unë nuk e takova.
Ndërkohë që më herët ai kishte ardhur në shtëpinë time, ku më kishte kërkuar numrin e nënës së Osmanit për ta ngushëlluar.
Por unë i thashë se nuk ta jap numrin e telefonit të nënës së Osmanit, dhe të shkonte ta merrte te Skënder Ulliri, pasi ti e njeh atë.
I pyetur se përse nuk ia kishte dhënë Ibrahimit, numrin e nënës së Osmanit, Ramazan Tabaku, tregon se tashmë midis tij dhe kësaj të fundit kishte një debat që kish lindur pas vrasjes së djalit të saj.
Ramazan Tabaku
Unë nuk ia dhashë Ibrahimit, numrin e telefonit të nënës së Osmanit, pasi nuk doja të merresha me këto problem.
Kjo pasi nëna e Osmanit do më pyeste se ku e ka njohur djali i saj këtë familje.
Unë i thashë Ibrahimit që të shkonte dhe t’ia merrte Skënder Ullirit numrin e telefonit të saj pasi ishte ky i fundit që e kishte prezantuar në këtë familje.
Por ajo që përbën habi në dëshminë e dhënë nga Ramazan Tabaku, është fakti që ai në një asnjë moment nuk i përmend çantat me drogë.
Si një nga shkaqet për të cilën ai largoi Osmanin nga banesa e tij në Greqi.
Gjë e cila bie në kundërshtim edhe me bisedën telefonike që ai kishte bërë me nënën e këtij të fundit, në momentin kur ajo e kishte pyetur se përse Ramazani ia kishte nxjerrë djalin nga banesa.
Ramazan Tabaku
Nuk është e vërtetë që Osman Berberi të ketë sjellë në shtëpinë time çantë me drogë. Unë po ta dija një gjë të tillë do e kisha larguar menjëherë nga shtëpia dhe jo t’i më ti jepja afat prej një jave që ai të largohej.
I pyetur në lidhje me marrëdhënien që Osmani kishte me Besnik Ndoun dhe vëllezërit e tij, ai u shpreh se nuk kishte dijeni për raportet midis tyre.
Ramazan Tabaku
Unë nuk e di se çfarë raportesh ka pasur Osmani me vëllezërit Ndou.
Unë kam njohur Lin Ndoun me të cilin kam shkuar një herë në Greqi, si edhe Besnikun i cili më ka ardhur një natë në shtëpi në kohën që Osmani ishte në banesën time. Unë nuk i njoh marrëdhëniet mes tyre.
Ata nuk vinin në shtëpinë time. Vetëm një herë ka ardhur Lini dhe një herë Besniku, ku Lini punonte rreth 4-5 orë larg, ndërsa Besniku nuk e di se ku punonte.
Por a është treguar i sinqertë Ramazan Tabaku në thëniet e tij, apo edhe ai ka qenë i frikësuar në dëshmitë e dhëna.
Ku ky i fundit mohoi në dëshminë e tij, edhe një sherr që thuhet se Osmani kishte pasur në banesën e tij në Greqi, mbrëmjen e Vitit të Ri, me Besnik Ndoun.
Ramazan Tabaku
Unë për Vitin e Ri kam qenë në Shqipëri dhe e kam kaluar pranë familjes time. Kur kam shkuar në Greqi, kam mësuar se Osmani, Vitin e Ri, e ka kaluar në shtëpinë e Ibrahimit. Këtë gjë ma ka thënë vetë Osmani. Ndërsa për sherrin që thoni që është bërë në shtëpinë time në Greqi, unë nuk kam fare dijeni. Pasi ndryshe këtë gjë do ma thonin dhe komshinjtë e mi atje.
Siç del më tej, edhe pse Osmani e kishte teze bashkëshorten e Ramazan Tabakut, ky i fundit nuk e ngushëlloi motrën e gruas së tij për humbjen tragjike të të birit.
Ramazan Tabaku
Unë vdekjen e Osman Berberit e kam marrë vesh nga familja ime dhe këtë e mësova pasi u gjet trupi. Po kështu më thanë edhe komshinjtë e mi në Greqi që e kishin parë në televizor, pasi Osmanin e njihnin edhe ata.
Unë nuk e ngushëllova nënën e tij në telefon pasi ajo filloi duke më thënë që ty do të të kapë policia, pasi ti di shumë gjëra dhe unë në nerva e sipër i mbylla telefonin.
Por duke iu kthyer edhe njëherë ditës së tij të fundit në të gjallë, është interesante për të parë episodin e fundit para rrëmbimit.
Diamanta Hima
Ludovik Ndreca është dhëndër në pallatin tonë, tek Prena Prebibaj. Ai banon në Mamurras dhe është me origjinë nga Fani i Mirditës.
Ludoviku nuk vinte në Kodër-Kamëz, por një natë para se të më humbiste djali, ai ka ardhur tek pallati ynë së bashku me Agustin Nilin dhe Siri Hasanin të cilët ishin me një makinë të zezë si Fuoristradë dhe u futën tek lokali i Lek Vatnikës.
Ata nuk e kërkuan Osmanin atë natë, por një ditë më pas mua më humbi djali.
Unë kam dyshim në vrasjen e djalit tim tek Besnik Ndou, i cili rrinte çdo ditë me Osmanin.
Si edhe tek Besard dhe Shkëlzen Byberi.
Atë ditë që më humbi djali unë dola tek shkallët e pallatit dhe Roland Daullxhiu më tha: ‘Nuk të erdhi Pushi mbrëmë në shtëpi?
Përse?,- e pyeta unë.
Ai më tha se mbrëmë Pushi ka bërë llafe me Besnik Ndoun.
Unë i thashë se e di këtë gjë pasi Osmani kishte bërë fjalë me Besardin dhe Besnikun. Pasi këta po tentonin që ta nxirrnin me forcë djalin jashtë, por ishte natë dhe nuk i kishte lejuar Roland Daullxhiu.
Me interes sipas nënës së Osmanit, është edhe roli i Skënder Ullirit. i cili sipas saj edhe ai di diçka, që gjithmonë është përpjekur ta fshehë.
Diamanta Hima
Skënder Ulliri banon në një kat me mua këtu në Kodër-Kamëz, ku pasi ka shkuar në Greqi ka vajtur menjëherë në shtëpinë ku jetonte djali im Osmani, pra në atë të Ramazan Tabakut.
Kjo ka ndodhur në muajin shkurt të këtij viti.
Djali im ka pasur një shok i cili kishte një grua me dy fëmijë.
Nuk ja di emrin shokut të Osmanit, por di që gruaja e tij është nga fshati i Skënderit dhe me këtë shok atë e kishte njohur Skënder Ulliri.
Skënder Ulliri ka çuar në shtëpinë e burrit të motrës time, Ramazan Tabakut, dy djem shok të tij, të cilët kanë qëndruar aty rreth dy-tre ditë dhe pastaj Ramazani i ka nxjerrë nga shtëpia.
Këtë gjë ma ka thënë në telefon Ramazani nga Greqia.
Në kohën që Skënder Ulliri ka çuar në shtëpinë e Ramazanit dy shok të tij, Osmani në atë kohë ka qenë në Greqi…
Unë e pyeta Osmanin se kush ishin këto dy shokë që kishte sjellë në shtëpinë e Ramazanit, Skënder Ulliri dhe Osmani më tha se ato ishin dy shokë të Skënderit dhe ishin nga Saranda…
Djalin tim Osmanin me shtetasin Prenush Mekshdeden e ka njohur vëllai i Besnik Ndout i cili quhet Lin Ndou në Greqi…
Në lidhje me personin me emrin Kujtim, nëna e Osmanit, tha se djali i saj nuk kishte njohje me të.
Dhe se ky person nuk kishte qenë i pranishëm as në mortin e djalit të saj.
Ndërsa ajo shpjegoi edhe lidhjen që Kujtimi me banim në Laç, kishte me familjen e bashkëshortes së djalit të saj tashmë të ndjerë.
